Установа культуры «Баранавіцкі краязнаўчы музей»

Заснаваны ў кастрычніку 1929 г. у Баранавічах як павятовы музей. Адначасова для наведвання была адчынена і першая музейная экспазіцыя. У музеі дзейнічалі 3 аддзелы: прыроды, гісторыі і этнаграфіі. У гады фашысцкай акупацыі музейныя фонды былі разрабаваныя. Першыя пасляваенныя гады - перыяд адраджэння Баранавіцкага музея. У цяперашні час Баранавіцкі краязнаўчы музей знаходзіцца ў гістарычным цэнтры горада, у будынку пачатку XX ст. Галоўная задача музея - захоўванне, вывучэнне гісторыка-культурнай спадчыны краю, выхаванне ў суайчыннікаў пачуцця патрыятызму, гонару і паважлівых адносін да гісторыі сваёй малой радзімы і краіны ў цэлым. Фонды музея налічваюць 59402 адзінкі захоўвання, з іх асноўны фонд - 40930 адзінак Сярод 35 музейных калекцый найбольш цікавымі з’яўляюцца: калекцыя паштовак з відамі г. Баранавічы (пачатку XX ст. і 1920 - 1930-х гг.); ручнікоў (канца XIX - першай паловы XX ст. Баранавіцкага і Ляхавіцкага раёнаў); нумізматыкі (манеты XVI - XX стст., у тым ліку 4 скарбы); падпольных выданняў перыяду фашысцкай акупацыі.

Музей адзін з культурна-адукацыйных цэнтраў горада, які прапануе тэматычныя, пешаходныя экскурсіі для розных катэгорый наведвальнікаў, музейна-педагагічныя заняткі, праграму “выязны музей”. 3 2010 г. прымае удзел у міжнароднай акцыі “Ноч музеяў’. Экспазіцыя Баранавіцкага краязнаўчага музея размешчана ў 7 залах і мае тры раздзелы: «Прырода Баранавіцкага краю» «Гісторыя Баранавіцкага краю», экспазіцыйны раздзел «Баранавічы. Горад, у якім жывём».

Музеі Беларусі: даведачнае выданне/рэд. Г.П. Пашкоў, Л.В. Календа, М.Г. Нікіцін. — Мінск, 2008. — 260 с.